هي اصطلاح پهريون ڀيرو آمريڪا ۾ 1998ع ”انتهائي پسنديده ملڪ“ واري اصطلاح (MFN) جي جاءِ تي استعمال ڪيو ويو، جنهن جو مقصد ڪنهن به ٻيءَ قوم سان آزاد واپار ذريعي رعايتن ۽ سهولتن سان ڀرپور ڪاروبار ڪرڻ آهي. هي اصطلاح آمريڪا طرفان اهڙين قومن سان ڪاروباري ويجهڙائيءَ جو اظهار ڪري ٿو، جيڪي سياسي ۽ سيڪورٽي جي حوالي سان سندس ناڪاري فهرست تي نه آهن، تنهنڪري خانگي توڙي سرڪاري آمريڪي ادارن کي، اهڙين قومن سان وهنوار ۾ ايندي، ڪنهن به خوف خطري جو انديشو نه ٿو رهي. البته جن رياستن سان آمريڪا جا تعلقات بهتر نه آهن، (مثال طور: ڪيوبا، ايران ۽ اتر ڪوريا وغيره) انهن ملڪن سان سندس ڪي به اطمينان جوڳا سياسي ناتا پڻ نه آهن. ان ڪري ساڻن ڪاروباري لاڳاپا به ڇڪتاڻ ۽ بندشن واري صورتحال جي عڪاسي ڪن ٿا ۽ کين NTRs جي معيارن سان نه ٿو ڏٺو وڃي.